الثقافة التسويقية بين السعودية ، دبي ، و المصارعة الحره



خطرت لي فكرة هاذي الملاحظة قبل حوالي أسبوع و أنا أتابع مقابلة لأخوي إبراهيم السحيباني لكن تراجعت أكثر من مرة عن كتابتها لسبب و هو إني ما أتوقع وجود جمهور كبير للمصارعة الحرة بين القراء و هذا يمنع الأكثرية من إستيعاب بعض النقاط إلي بأتكلم عنها .. لكن تذكرت مقولة "أكتب لنفسك و سيصل ما تكتبه للناس" و قررت إني أكتبها و بأحاول قد ما أقدر أوضح كل نقطة أكتبها .

بحكم إني من عشاق مدينة دبي و من أشد المعجبين بالعمل المستمر إلي تقوم فيه حكومة دبي في تطويرها ، و بحكم إني رضعت عشق المصارعة من يوم ما كان عمري 3 سنوات و بدأت متابعتها قبل أفلام كرتون ((الله يسامحك يا خالي)) ، و بحكم إني أولاً و قبل كل شيء سعودي و عاشق لكل حبة من تراب بلدي .. أستغرب ..

ليش ما نتعلم من ثقافة دبي التسويقية و كيفية تسويقهم حتى للمسامير في مدينتهم ؟

ليش ما نتعلم من المصارعة الحرة و كيف يستفيدوا حتى من أخطائهم تسويقياً ؟

مثلاً ..

في دبي عندهم دوار ((ميدان)) إسمه دوار الساعة .. جميل .. ما يعتبر تحفة أو دوار خارق للعادة .. لكنه حلو هاذي صورته للي ما شافه قبل كذا .

الدوار هذا برغم بساطته إلا إنه حسب ما شفت شخصياً خلال 5 زيارات سابقة لدبي إنه تم التسويق له بشكل رائع ، مجسمات تذكارية .. سلاسل مفاتيح .. ألعاب تركيب "Puzzle" .. رسومات .. إلخ و الإقبال عليه جـــداً كبير .

عندنا في جدة لحالها فيه دوارات ترد الروح و أجزم إنه لو تم تسويقها بنفس الطريقة بيكون حجم المبيعات هائل .. و هاذي بعض الصور كأمثلة .

متوسط عدد الحجاج في السنة 2.5 مليون حاج .. و كللللهم يمروا على جدة و هذا بدون حساب المعتمرين و زوار المملكة في باقي شهور السنة .. و مع ذلك ما في و لا منتج تذكاري لمدينة جدة في الأسواق .. حتى نافورة جدة و هي إلي طايرين فيها السما من مليون سنه على إنها أطول نافورة في العالم .. ما لها أي منتجات تذكارية .

الكل يعرف إنه المصارعة تمثيل طبعاً ((لا يا شيخ ؟)) و كل المباريات متفق عليها قبل ما تبدأ ، المهم ..

قبل حوالي 14 سنه (1997) صارت فضيحة كبيرة في شركة المصارعة WWF و قصتها إنه مصارع إسمه بريت هارت ألغى تعاقده معاهم و وقع مع شركة ثانية إسمها WCW ، و كان الإتفاق إنه يلعب آخر مباراة له في WWF و يفوز فيها و بكذا تكون نهايته مع الشركة نهاية حلوه خاصة قدام المتابعين .

في نص المباراة قرر صاحب الشركة فينس مكمان إنه يخلي بريت هارت يخسر .. فكلم الحكم و الحكم أنهى المباراة و أعلنوا إنه بريت هارت خسر المباراة .

بعد المباراة صارت مشاكل و قام بريت هارت يخبط و يسبسب و ضرب صاحب الشركة .. و هاذي الحادثة إشتهرت لدرجة إنها تعتبر أكبر وصمة عار على شركة WWF في تاريخها .

و بعد حوالي 13 سنه (العام الماضي) تصالح بريت هارت و فينس مكمان .. و بدل ما يفتحوا صفحة جديدة و ينسوا الماضي قرروا يستغلوا قصة الفضيحة إلي لها 13 سنه و يستفيدوا منها تسويقياً فسووا قصة بينهم إنتهت بمباراة كبيرة في أكبر مهرجان مصارعة WrestleMania و كانت المباراة من أكبر المباريات في هذاك المهرجان ، و هذا فيديو إعلان للمباراة يحكي القصة للي حاب يتفرج عليه .

عندنا هنا في جدة خلال السنوات الماضية إبتلانا الله بالسيول مرتين و مات كثييير في هاذي السيول و بدل ما يتم إستغلال هاذي الكارثة في تقريب الشعب من بعض و التسويق للإصلاحات إلي تمت أو ستتم بسبب هاذي الكارثة كل إلي صار إنه بعد حدوثها سوت الجرايد دوشه و المسؤولين في جدة قالوا بنعاقب و بنسوي .. و بعد كذا تعميم شاااامل .

ليش ما نستغل أخطاء الماضي في التسويق للإصلاح .. في التسويق للتطوير .. في تقريب فئات المجتمع من بعض ؟

تخيلوا لو أحد من أهل جدة شاف إعلان في الشارع ((معاً ضد من تسبب في ضياع أبنائنا)) ((لن تضيع أرواح أبناء جدة دون ثمن)) و بناء على شعار مثل هذا يكون فيه دور للمواطن حتى لو بسيط في الإصلاح ، أتوقع الكل بيشارك و الكل بيساعد و التأييد بيكون هائل .

في دبي كانت فيه حمله تسويقية كبيييرة لإفتتاح مترو دبي و معروفه بإسم 9-9-9 ، من قبل الإفتتاح بأكثر من ستة أشهر تم الإعلان عن موعد الإفتتاح ، يوم 9 شهر 9 سنة 2009 الساعة 9 و 9 دقايق و 9 ثواني .

كم إعلان شفنا عن هذا الموضوع ؟ كم خبر إنكتب في الجرايد ؟  كانت حمله تسويقية عملاقة ، و أذكر إننا تابعنا الإفتتاح على الهواء مباشرة في التلفزيون .. صح إننا في السعودية و مالنا علاقة و أساساً ما في شي يجذبك كمشاهد تتفرج على إفتتاح مترو .. بس العقول التسويقية في دبي حسستني إن الحدث تاريخي و ماله مثيل و لازم أكون جزء منه حتى لو بالمشاهدة ، و هاذي صورة لساعات كانت منتشرة في كل مكان في دبي قبل الإفتتاح .

عندنا .. فتحوا جسر الجمرات .. فتحوا أكبر شاشة إعلانية في الشرق الأوسط .. فتحوا كباري جديده .. فتحوا أسواق .. فتحوا روس العالم .. و لا أحد دري عنهم ، أكبر تسويق ممكن يتم للأحداث الموجودة عندنا يكون في الجرايد .. غير كذا ؟ سلامتكم .

أمثله ثانيه على السريع ..

في دبي حالياً يسوقوا لمسامير من نفس النوع إلي تم إستخدامه في بناء برج خليفة .. محطوطه في علبة جزاز و مكتوب تحتها ((إستخدمنا "عدد" من هذه المسامير لبناء برج خليفة)) و تباع بمية درهم .

فيه مصارع إسمه ذا روك له شعار معروف "Just Bring It" الآن فيه حملة كبيرة لهذا الشعار بإسم "Team Bring It" و عدد المعجبين في صفحة الفيس بوك الآن 3.214.828 و أرباحها فوق 10 مليون دولار بس من التي شيرتات إبتداء من 4 إبريل .. يعني خلال شهرين تقريباً ، و هذا فيديو للمصارع يتكلم فيه عن الحملة .

ملاحظة : فيه كلام قلة أدب .. شغل على مسؤوليتك

الزبدة :

• بلدنا مليانه أشياء رائعة و ممكن تكون عالمية لو سوقنالها ((صح)) أو سوقنالها ((من الأساس)).
• بلدنا مليااااانه عقول تقدر تسوق و تقدر تبدع و أكبر دليل الفيس بوك و الديفاينت أرت و المدونات .. بس للأسف ما في إستغلال لهاذي العقول .
• أذكر كلمه قالي إياها مديري "مو مهم إيش تبيع .. المهم كيف تسوقله" .

... عجبي .