في الأيام الماضية جتني أسئلة كثير في تويتر عن الوظائف و الحياة العملية ، و طبعاً بما إني ماني مؤهل أتكلم عن هذا الموضوع من وجهة نظر علمية فقررت إني أكتبلكم تجربة شخصية يمكن تفيد الإخوان و الأخوات المقبلين على الحياة العملية .
كتابتي في هاذي الملاحظة بتكون مركزه على أول شهرين في وظيفتي الجديدة إلّي بدأت فيها من تاريخ 9/7/2011 و إلى يوم 9/9/2011.
طلبوني لمقابلة شخصية مع رئيس قسم التوظيف .. قابلته و قالي بنتصل عليك خلال أسبوعين علشان المقابلة الشخصية الثانية مع الشخص إلّي إذا ربي وفقك بيكون مديرك ، جاني إتصالهم ثاني يوم الساعه 10 الصباح و قالوا تعال اليوم علشان المقابلة الثانية .. وصلت الشركة قبل موعد المقابلة و دخلت للمبنى الخاص بالإدارة العليا .. أخذتني هيبة المكان و إحترافية العاملين فيه إلّي تعاملت معهم و أنا في الإنتظار .. و جلست أفكر في الخمسه وظائف إلّي إشتغلتها خلال الأربع سنوات الماضية لحد ما وصلت لهاذي المقابلة الشخصية في إدارة وحده من أكبر شركات المملكة .. ما أخفيكم إني حسيت بالرضا عن نفسي و جلست أستعد للمقابلة بترتيب أفكاري و بالدعاء .. لحد ما قلولي تفضل علشان المقابلة .
قبل ما أقابل المدير كان عندي تصور معين لشكله و عمره و أسلوبه .. دخلت و تفاجأت بشخص مختلف تماماً ، في أواسط الخمسينات .. جالس بدون شماغ و قدامه ولاعه من الولاعات الكبيره إلي ماليه السوق هاليومين و فنجان قهوه تركي و طفاية سجاير .
صورة الولاعة الكبيره
