05‏/06‏/2011

الزواج



الحمدلله ربي أنعم علي بثلاثة أخوان ينطبق عليهم المثل ((رب أخ لم تلده أمك)) .

الأول بنفس عمري .. تزوج من ثلاث سنوات و من يوم ما تزوج كل ما قلتله ((مشغول مع أهلي)) يقولي ((إيش عندك ؟)) و المعنى من هاذي الجملة ((دامك منت متزوج ما عندك شي ، و لا تقول أهلي و أهلي)) ، فصرت كل ما كلمته في شي قلتله ((تدري .. أنا مشرد ما عندي أهل و لا ورايه زوجه .. فخذني على قد عقلي)) .

الثاني مديري في العمل .. هندي .. أكبر مني بثمنيه سنوات .. 3 سنوات من يوم ما جا السعودية دايماً نطلع سوى و نسهر سوى .. تزوج قبل 9 شهور تقريباً .. و من يوم ما تزوج فــجــأه شاب نص شعر رأسه و صرت كل ما قلتله شي يقولي ((إنتوا شباب)) .

الثالث أصغر مني بسنه .. ملكته كانت قبل شهرين و إن شاء الله زواجه في شوال .. من بعد ملكته بيوم صار كل ما جلسنا مع بعض يقولي ((ها .. ما نويت ؟ ما بقي إلا إنت)) مدري هذا إذا تزوج إيش بيسوي فيني .

صرت أحس يوم أجلس معاهم إني مختلف .. كأنه عندي عنقز ((مرض معدي يظهر على شكل حبوب على الجسم)) .. كأني منحرف .. طايش .. غير ناضج .
 
عندنا شغالة من أكثر من 30 سنة ، كانت شغالة جدتي و مستمره معانا مع إن جدتي متوفيه من 15 سنه ، لها تقريباً سنتين كل ما أقابلها تفتحلي ثلاث مواضيع و كل مره بنفسسسس الترتيب ...

الأول "ذكريات" : ما شاء الله يا عبود صرت رجال .. أتذكر لمن كنت صغير تجي تطفشني في المطبخ ((يا خاله مريم سويلي فطور يا خاله مريم وديني البقاله)) .

الثاني "حزن" : الله يرحمها جدتك و الله كل يوم أفكر فيها .

الثالث "مستقبل" : متى أفرح فيك و أرقص في زواجك .. تعرف قريبتك هاذيك ؟ و الله حلوه و مؤدبه .. أخطبلك إياها .

يعني حسب منطق خاله مريم .. مدام قريبتي حلوه و مؤدبه .. لازم أتزوجها .

قبل فتره جالس في العمل قبل نهاية الدوام بساعة و ما عندي لا شغله و لا مشغله فقلت فرصه ألفلف على الأقسام .. دخلت قسم التسويق و جلست أسولف مع أبو أحمد و شوي فتحلي سالفة الزواج ..

أبو أحمد : ها يا أبو عابد .. متى نفرحبك .
أنا : شايفني جالس على قلبك .. خليني في حالي يا أخي .
أبو أحمد : جد و الله متى ناوي تتزوج .
أنا : إن شاء الله بعد الماجستير ((تصريفه)) .
أبو أحمد : يا أخي تزوج و أدرس إيش المشكلة .
أنا : ما في مشكلة بس لسه ما نويت .
أبو أحمد : فيه شي مانعك ؟ عندك مشكله ؟
أنا : ((رفع ضغطي)) .... مشكله .. زي إيش تقصد ؟؟
أبو أحمد : ماليه .. نفسيه .
أنا : ....... الشرهه على إلي يجي يجلس معاك .

طلعت من قسم التسويق و قلت مالي إلا قسم تقنية المعلومات أكثرهم هنود و مديرهم أكبر مني بخمسه سنين و إلى الآن ما تزوج ما أظن بيفتحولي هذا الموضوع ، دخلت القسم عندهم و خاب ظني ..

عبدالباري : ما سمعت الخبر يا عبدالله ؟ عبدالباسط خطب و زواجه بعد 4 شهور .
أنا : ما شاء الله .. ((بأضيع الموضوع)) المهم إنتوا كيف الشغل معاكم ؟
عبيد : يالله ما بقي إلا إنت و مديرنا .. متى إن شاء الله ناوين ؟
أنا : زوجوا مديركم بعدين تعالوا كلموني .
مديرهم : أنا إخترت العروسة و إن شاء الله السنه الجايه الزواج .. و إنت .
أنا : أوووه نسيت جوالي في مكتبي .. أمر عليكم بعدين .

ما أدري .. علشان أهرب من هذا الموضوع فين لازم أروح ؟ إيش لازم أسوي ؟ أحياناً أفكر أتزوج بس علشان أرتاح من هاذي الدوشة .. يرضيكم ؟؟؟

الزبدة :
  • ما أدري ليش عندنا عقدة من إن الواحد يوصل 25 سنه و هو لسه ما تزوج .
  • ليش أي واحد يوصل 25 سنه و هو لسه ما تزوج يعتبر يا عنده مشكله عائلية .. يا مريض نفسياً .. يا مفلس ؟
  • ليش دايماً العزوبية مربوطة بالطيش و الفراغ ؟
  • ليش دايماً الإجابة على سؤال ((الحالة الإجتماعية)) بكلمة ((أعزب)) لازم يجي بعدها سؤال ((ليش ؟)) أو ((متى إن شاء الله ؟)) .
... عجبي .

16 التعليقات:

إسراء يوسف يقول...

يا ألله حتى انتو الرجال؟ علبالي بس عندنا البنات الوضع هذا :/ 
تصدق في بيتنا قليل الناس الي يحكوا في الموضوع هذا عشان ماما وبابا مايحبوا الناس تتدخل في اي شي من أمورنا
لكن لما كنت في المستشفى مايمضي كم يوم الا ومريضه تسألني، تزوجتي؟ لا؟ ليه؟ ماودك تتزوجي؟ 
أول حاجه 
يعني اذا تزوجت اكيد مافي شي ناسبني أو ماحد خطبني أو ما أبغى
أجوبه منطقيه يقدر أي احد يجاوب نفسه عليها قبل ما يسأل
والأسئلة الي تجي بعدها من من حقك تسألها أحد مو من أقاربك المقربين أصلاً
ودايماً يقولوا الله يرزقك! الله يبعثك ولد الحلال! 
طيب سؤال، أصلا أحد قالكم أنا زعلانه يعني وحموت عشان تتكلموا معايا بالطريقه ذي وتدعولي هالدعوه كانها اهم حاجه بالدنيا 
تعرف مره من التهوّر خبصت في الكلام مع وحده منهم ودار هالحوار
- تزوجتي؟
-لا
-ليه؟
-بس ما أبغى وجع راس على غير سنع
- بس ولاد الحلال كثار 
قمت رميتلها قنبلة وقلت " ايش درّاك اني بنت حلال طيب؟ ممكن هو كويس بس أنا مو كويسه !!!! "

وماتتخيل وجهها كيف صار انصدمت بعدين قالت شكلك بنت حلال وضحكت، قلت ايه هذا الي يبانلكم بس ماتدروا عن شي !!!!  

يعني مادري ايش اسوي يعني ..

اشوا اني الحين متخلصه من هالأسئلة من مده اللهم من صاحباتي المتزوجات مرات، النكته اني لما أقولهم لأ ، يقولوا والله أحسنلك، أصلاً مايجيب غير وجع الراس عيشي حياتك بس ياريتنا زيك ..

والأظرف ان نفس البنت الي تقول الكلام هذا تجيبلي عرسان هههههههههههههههههههههههههههههههههههههههه

مادري ايش مشكلة الناس، فعلا كل بني ادم عنده سبب ماخلاه يتزوج ومو من حقك تسأله
يعني بس اسال تزوجت ولا لأ وخلاص لاتزيد عليه انت ايش دخلك اصلا تتدخل في خصوصيات الناس؟!!! 

وفي النهاية أقول الله يعينك يا عبدالله

Awoosha يقول...

أول مرة أعرف إن الرجال تصيدهم هالحالة ~ الله يعينك
لأنهم ما بقفلوا هالسالفة إلا لما تتزوج .. لا بعدين راح تبدأ سالفة جديدة
إلي هي " ها .. كم ولد عنك ؟ "  وإذا عندك واحد بسألونك " متى الثاني ؟ " << مادري بعد هذي بس عندنا ولا تصير للرجال !!!

بالنسبة لي بس الوالدة الله يحفظها اللي تذكر الموضوع كثير وبعض الأقارب
وصديقاتي اللي كلهم متزوجات إلا أنا بالعكس يقولون لي أحسن لك عن عوار الراس << مو يقولون أسأل مجرب هع

أما بقية أفراد المجتمع ما أدري ليش يهتمون بهالموضوع !!!

مادري .. يعني ليش تفكيرهم محدود وإن لازم نتزوج ولا ما بتكون عندنا حياة نعيشها
احنا مو ضد الزواج بس لكل شخص أسبابه .. عاد أتحداك لو قلت لهم هالأسباب ياكلونك بقشورك

بس ما عليه بعد أنتوا أهون لكن أحنا البنات اللي ما يرحمونا
يلا كبرتي خلاص بتصكين الثلاثين بعد كم سنة واللي كبرك عندهم عيال ومحد يبغيك بعدين << يحسسونك بنهاية العالم ><

والقصة تطول وما تقصر
والله يعين الجميع ^_^

’’ رٍوح السـ‘ع‘ــوٍدية ’’ ... يقول...

الزواج والزواج .. 

نفس اللي يصير معاك يصير عند البنات بس ب اختلاف طريقه طرح السؤال .. عند الشباب .. متى بتتزوج .؟ و عند البنات .. باقي ما تزوجتي ..؟ سؤال ما تدري وش تجاوب عليه غير بجملتين في اغلب الاحيان ... والله باقي ماجاء نصيبي .. والله كريم .
وفي داخل البنت تقول يعني لو تزوجت بتشوفيني قدامك ههههههههههه . 

طبعا قبل كل شي لآزم نتاكد ان الزواج قسمه ونصيب ويمكن ربي كاتب لي ولغيري ما تنزوج .. يعني وين المشكله .

والشاب لما يأجل موضوع الزواج .. اكيد في باله شي .. اما انه يبغى يحسن وضعه المادي .. اذا كان عنده وظيفه . لازم يكون عنده بيت .. سياره . ووو ... اذا ما توفرت له ذي الاشياء وشلون يتزوج . وعمر العزوبية ماكانت طيش .. الا في حالات معينه.

الكلام في ذا الموضوع كثير ... ويفتح 60 ملاحظه ..

 والله يعينك على مريم ... :)

الخلآصه .. الله يوفقنا اجمعين ..

Mola7dat يقول...

الله يعين الجميع يا إسراء ...

أنا نفس الشي .. أمي ما عمرها تفتحلي هذا الموضوع و إذا أنا جبتلها سيرة تقولي إذا نويت تتزوج خلي خالاتك يشوفولك عروسة .. مالها خلق أم عبدالله :) .

بس إنتي كمان .. أحد يرد كذا ؟ إيش إلي أنا مو كويسه !! الله يقطع شيطانك ضحكتيني قبل الدوام .
و فعلاً زي ما قلتي فيه ناس تخلي قضيتها إنك ما تزوجتي .. الله يعينا عليهم .

دايماً منوره و مشكورة إنك ضحكتيني على صباح ربنا :)

Mola7dat يقول...

آمين يا رب .. الله يعين الجميع على هالمصيبة إلي زي ما قلتي أختي عائشة ما بنرتاح منها إلا بالزواج .
و بالنسبه لموضوع "كم ولد عندك ؟" أنا مستغل هاذي النقطه .. كل ما واحد قالي "ما تزوجت ؟" أرد عليه "ها متى بيجيك ولد ؟".

و على قولك البنات أكيد معاناتهم أكبر بحكم العادات و المجتمع .. اللهم ألهمنا الصبر و السلوان .

لا عدمنا تواجدك أختي عائشة

Mola7dat يقول...

إيييه على خاله مريم .. أمس شفتها و تذكرت الملاحظة و إبتسمت قالتلي : ((ها مبسوووط اليوم .. لا تكون تحب ؟ دلني عليها خليني أخطبلك إياها)) و طبعاً ما إستحملت و ضحكت من قلب .. فخلاص ثبت الموضوع عند خالة مريم .

بس ليش إذا تزوجتي ما بيشوفوكي .. بتختفي ؟

و إذا الموضوع بيطول نفتحله 100 ملاحظة إيش المشكلة .. إنتي بس لا تحرمينا من إضافاتك أختي روح .

دايماً سعيد بتواجدك :) .

Nora يقول...

يابثارة هالناس
انا عندي شي ثاني ليش ماتوظفتي ؟
طيب كيفي ماابي مالي خلق لسا

وفيه طبعا سؤال ليش ماتزوجتي
شكلهم يحسبون البنت تخطب لنفسها والا شي
احسن رد محد ملي عيني هههههههههه

احسن شي التصريف :\

Mohmmed Amen يقول...

في جزئية الاصحاب انت اصحابك زي اصحابي يعني تقولهم نطلع طلعة .. نشم هوا شوية يقولوا والله اهلي والله حرمتي تبى تروح مشوار يحسسوك ان انت مقطوع من شجرة وماعندك اهل ... صديقي العزيز لمن تتزوج حيكون عندك اهل مثلا

Mohmmed Amen يقول...

في جزئية الاصحاب انت اصحابك زي اصحابي يعني تقولهم نطلع طلعة .. نشم هوا شوية يقولوا والله اهلي والله حرمتي تبى تروح مشوار يحسسوك ان انت مقطوع من شجرة وماعندك اهل ... صديقي العزيز لمن تتزوج حيكون عندك اهل مثلا

نسيم الفجر يقول...

للزواج حدين. تنعدم السعادة لو أسيئ فهمه و التصرف حياله، كما يصبح نعمة محفزة و حيوية لو علم المتزوج سر الحياة و كيفية التعامل معها.

Shehab Hassan يقول...

ايه عبد الله من جد متى بتتزوج << صاحب الرد بيتفقع بعد قليل :d
ياخي انا ماهمني يسئلوني ليش أنت ماتزوجت اقوله ظروف واخليه يغير الموضوع
لكن الي يهمني انه مره كنا نتكلم على زميل لنا بالعمل
وهاذا الانسان يخلص دوامه 4 العصر لكن يومياً يجلس بالمكتب الين 9 أو 11 الليل على حسب المزاج وعمره تقريباً 30 سنة
قام كل واحد يسئل ليش ماتزوج وليش يقعد بالمكتب هاذا الوقت كله
واحد قال شكله منحرف والثاني يقول شكله وحيد والثالث يقول وهاتك كلام من هنا وهنا
وقبل فتره جاني رجال يسئل عن هاذا الشخص وعن اخلاقه وانه يدخل ولا مايدخن صراحة قعدت امدح فيه واقول رجال ولد رجال عرفت من كلام رجال انه راح قدم لي أهله
من جد فرحت له احسه هالانسان ماله اصدقاء عشان كذا يجلس كثير لوحده والله يوفقه ويتمم له الخير
الزبدة << مايقلد هههههههه
الزواج قسمة ونصيب مو كل من سئلني ليش ماتزوجت اروح اتزوج على طول ..
شكراً لك .. شهاب

Mola7dat يقول...

بس المشكلة في إجابة "محد ملى عيني" إنه يجي بعدها مسألة إنهم يشوفولك عريس أو عروسه  .
الحل يا نوره إن الواحد يأكل إلي يعجبه و يسوي إلي يعجب الناس ، قالولك ليش ما توظفتي .. توظفي ، قالولك ليش ما تزوجتي .. إطلعي الشارع و تزوجي أول واحد تشوفيه هههههههههه :) .

ما أقول إلا الله يعين .

Mola7dat يقول...

مادامت الحاله مستفحله و منتشرة يبغالنا نبدأ حمله نسميها "العزوبية لا تعني التشرد" .
... عجبي .

سعيد بردك أخوي محمد و فرحتني يوم قلتلي إنك تعيش نفس الحالة ، الواحد يحس إنه ما هو لحاله في هذا العالم .. حلوه المشاركة الوجدانية .

أخوك
عبدالله

Mola7dat يقول...

لا إختلاف على أهمية الزواج و أهميته كسبب مهم من أسباب السعادة ، لكن الإختلاف حول مدى ضرورة الزواج "الآن" فالأكثرية تربط الزواج بالعمر فحين وصول الشخص إلى عمر معين بنظرهم "لا بد أن يكون متزوجاً" أو "لا بد أن تكون هناك مشكلة".

سعدت جداً بكلماتك الجميلة أختي نسيم و لا عدمنا إطلالتك و إضافتك الرائعة .

أخوك
عبدالله

Mola7dat يقول...

يا حيالللله أخوي شهاب .. من طول الغيبات جاب الغنايم :) .
صح لسانك .. المشكله هي القيل و القال .. يا منحرف .. يا حالة نفسية .. يا مفلس .. يا عنده مشاكل عائلية .
محد يفكر إنه يمكن ما حس إنه وقت الزواج جا .. محد يفكر إنه يمكن ما هو جاهز نفسياً أو لسه عنده خطط يبغى يسويها قبل الزواج .

يالله شد حيلك يا شهاب و خليك عند كلمتك .. مو بكره أحد يقولك ليش ما تزوجت و تروح تتزوج ، لا تتزوج إلا إذا كنت إنت تبغى تتزوج .

و لا تنسى ترسلنا كروت الزواج .. بشرط إنك تكون جايب سمبوسه على العشا :) .

العفو .. و دايماً أسعد بتواجدك أخوي شهاب

Nora يقول...

ههههههههههه حلوه اطلع في الشارع هذي
هم لو يقلون لي تزوجي اقولهم ابشرو بكرة بروح اخطب لي بس اهم شي لحد يقول وش ذا اللي ماتستحي((تحجيييير ههههههههه

إرسال تعليق