02‏/09‏/2011

لن أعيش في جلباب أبي .. أو أمي



بداية و في مقتبل هذه الملاحظة أحب أعيد عليكم و على كل الأمة الإسلامية بمناسبة حلول عيد الفطر المبارك .. أعاده الله علينا و عليكم باليمن و البركات "هاذي المقدمة برعاية القناة السعودية الأولى .. من 20 سنة و هم يستخدمون نفس الصيغة".

العيد هاذي السنه ثلاثه أعياد بما إنه عيد الفطر .. و عيد ميلادي كان أمس (يلمح إنه يبغى هديه) .. و بما إنه زواج أعز أصحابي بعد كم يوم إن شاء الله .. شعور جميل يوم تشوف صاحبك إلي كنت تشرد معاه من المدرسة أيام الثانوي يتزوج .. تحس إنك ربيت رجال :) .

و طبعاً أغلبكم من إلي تزوج له أخ أو أخت أو قريب يعرف إنه الزواج يسبقه دوشة ترتيب و تجهيز و صداااع له أول و ما له آخر .. و في العاده كل القريبين من العريس أو العروسه يشاركوا في هاذي التجهيزات ، و بناء على هذا الكلام أول ما سوا صاحبنا هذا ملكته قبل 3 أشهر جيته أنا و باقي الشباب من المقربين منه و إحنا مشمرين و رافعين ثيابنا و مستعدين للشغل و قلناله آمر .. إيش تحتاج مننا ؟ قالنا لسه بدري أعطوني كم يوم و بعدين بأقولكم إيش الخطه ، رجعناله بعدها بأسبوع و سألناه إذا كان يحتاج شي قال : ( أمي قالت بتتكفل بكل شي) .

بعدها بفتره سألناه عن آخر التطورات .. قال إنهم بيزوجوه هو و أخوه في يوم واحد و قرروا يسكنوهم في الشقه الفاضيه الموجوده في عمارتهم .. بيقسموها بالنص بينهم .

الأسبوع الماضي إتصل علي و قالي تعال شوف شقتي جاهزه من مجاميعو ما بقي غير التلفزيون و المدام .. رحت أشوفها .. و ياااا ليتني ما رحت ..

أول ما تفتح الباب تلقى نفسك في المطبخ .. الفرن و الثلاجة لاصقين في بعض .. بعد كذا غرفة جلوس صغيرة .. بعدها غرفة نوم صغيييرة من صغرها السرير لاصق في التسريحة .. يعني لو الحرمه تبغى تحط مكياج لازم تجلس على السرير و ما في محل إلا لكومدينه وحده جنب السرير  "الكومدينه : الأدراج إلي تنحط جنب السرير" .. و بعد غرفة النوم نوصل للحمام الله يكرمكم .. تخيلوا الحمام من صغره لو تبغى تأخذ دش ممكن تجلس في المغسله بالغلط .. و صدقوني ما أبالغ لو قلت إن عرض الحمام حوالي المتر و طوله ما يزيد عن مترين .

حسيته و هو يورينا الشقه ما هو راضي عنها .. لكن أهم شي عنده إنه يتزوج و السلام لو حتى في علبة تونه المهم يتزوج ، و فعلاً بعد ما طلعنا و ركبنا السياره قالنا إنه أمه ما سمحتله أو لأخوه يختاروا أي شي و هي جهزت كل شي ... لدرجة إنهاجابتلهم نفس العفش بالضبط من الغسالة للفرن لغرف النوم كلللل شي متطابق علشان "ما تبغى الحريم يغاروا من بعض".

رحنا بعدها للسوق علشان يشتري جزمة العرس الله يكرمكم .. و كمفاجأة أخذته لمعرض ألكترونيات و قلتله يالله يا سيدي إختار تلفزيونك و أهم شي يكون Full HD علشان تعرف تلعب بلاي ستيشن و تتفرج الدوري الإنجليزي برااااحتك .. هديتي لك بمناسبة الزواج .
سكت شوي ... طالع فوق .. طالع تحت .. و طلع الجوال من جيبه و قال : (خليني أتصل على أمي أتأكد إنها ما هي مرتبه شي بخصوص التلفزيونات كمان) .. بصراحه أنا وقتها خرب مزاجي و ضيعلي فرحة المفاجأة و الهدية .. إتصل بالست الوالده و سمحتله إنه يجيب التلفزيون بنفسه .

جلس هو و صاحبنا الثالث يتفرجوا على التلفزيونات و أنا بالقوووه ماسك أعصابي مع إنه ما لي شغل و حالتي ينطبق عليها المثل (واحد شايل الشيله و الثاني تعبان فيها) بس بصراحه الأم دكتاتوريتها زايده حبتين .. صح إنه أمي أغلى عندي من الدنيا و ما فيها بس لو كنت مكان صاحبي هذا ممكن أفركش الزواج و أطلب من أمي تتزوج بدالي ...
طيب .. نفترض إنه أم صاحبي هذا "مارثا ستيورت" و عندها خبرة ديكور و فنانة .. برضه لازم يكون لي على الأقل لمسسسسه في بيتي يا ناس بيييييتيييي هذا .. و بعدين ليش لازم  نسكن كلنا في نفس العماره إذا بنضيق على نفسنا بالطريقه هاذي .. واحد منهم يأخذ الشقة و الثاني يستأجر في نفس الحي مدام ربي فاتحها عليهم .

قبل سويعات طلعت أنا و واحد صاحبي نتمشى و جلسنا نتكلم عن فواتير الجوال و الحد الإئتماني و خلافه .. فقالي إنه فواتير جواله توصل على صندوق بريد العائله إلي يستلمه أبوه .. و أبوه متعود أول ما يجيب الفواتير يفتحها وحده وحده و يشوف كل واحد من أولاده و بناته كم طلعت فواتيرهم ، و الشهر الماضي طلعت فاتورة صاحبي هذا 500 ريال فمسكه أبوه و ساله ...

الأب : ليش فاتورتك 500 ؟
الإبن : إنت عارف يا أبويه إني أستخدم النت في الجوال و طول الوقت إي ميلات علشان الشغل ..
الأب : طيب و إيش الأرقام هاذي .. مليون مره متصل على الرقم هذا .. مين هذا ؟
الإبن : هذا موظف عندي أكلمه لمن أطلع من الشغل أتطمن كيف الأمور ماشيه في الفتره المسائيه .. لا تزعل نفسك يا أبويه .. أنا بكره بأدفعها .
الأب : مو موضوع مين يدفعها .. السالفة إنه ما يحتاج الإسراف الزايد هذا .

رجال عمره 28 سنه .. متزوج و أب لطفل .. دخله طيب و ما عمره طلب مني .. ليش لازم أراجع فواتيره و أشوف كلم مين و ما كلم مين ؟

فذكرتني قصته هاذي بمكالمة لي مع أحد الأصدقاء ليلة العيد .. أرسلتله رسالة معايده و طلبت منه يتصل إذا لقى فرصه و إتصل بعدها بدقائق ...

أنا : يا أبو رها .. أبغاك تجي تشتغل معايه .
هو : و الله يا أبو عابد أتمنى بس إنت عارف الوالد من سنين يبغاني أشتغل في الخطوط و ما صدق لقيلي هاذي الوظيفة .. لي شهرين فيها و قرفان عمري .
أنا : كيف الراتب ؟ كيف العمل ؟
هو : الراتب طيب أفضل من الوظيفة السابقة .. بس الشغل زييي الزفت "و إنتوا بكرامه"
أنا : طيب .. تعال عندي و أبشرك الراتب إلي حددناه أعلى من راتبك 50% تقريباً ، و شركة عملاقة ...
هو : لا تحرق دمي يا أبو عابد .. و الله ودي و إنت عارف بس حكم القوي على الضعيف .. أبويه كان يشتغل في الخطوط و يبغاني زيه .
أنا : بكيفك .. بس علشاني أنا إلي مسمي بنتك و علشان خاطر رها بعطيك فرصه أسبوع بعد الإجازه .. فكر و كلمني لو حبيت .

قصه أخيره على الطاير ...

واحد من أصحابي جلس معايه مره و حكالي قصة حياته ، يقول ..
تخرجت من الثانوي و قلت لأهلي بكمل جامعه في كلية العلوم .. قال أبويه (لاااااا لازم تصير عسكري زيي و بعدين تكمل جامعه بالإنتساب) .
صرت عسكري و قلت لأهلي بتزوج بنت خالي .. و بما إن أمي من أبها و أبويه حضرمي قالت أمي (لاااااااا لازم تتزوج حضرميه .. إيش يقولوا عليك الناس) مع إنه أبوووويه ما تزوج حضرميه .
تزوجت حضرميه و سكنت في ملحق في بيت أهلي .. و يوم قلتلهم أبغى أخذ بيت لحالي .. قال أبويه (لااااااا راتبك على قدك و ما تقدر على مصاريف الإيجار) مع إني لو ما سمعت كلامه و كملت جامعه قبل العسكريه كان صار راتبي أحسن .

إيييييييه .. ما أقول غير الله يخليكي يا أم عبدالله ، قبل كم سنه كنت أمزح معاها و قلتلها أبغاكي تدوريلي عروسه .. طالعت فيني و قالت : (أنا ما أدور لأحد .. إنت إختار و أنا أروح أخطبلك .. علشان ما تجيني كل ما صار شي بينك و بينها و تقول إنتي إخترتيلي) .

أستغرب من إنه بعض الأهل يتدخلوا في أدق تفاصيل حياة أبنائهم لدرجة تخنق الأبناء و توصلهم لنتيجه من إثنين ..
إما إنهم يتهربوا من أي مسؤولية بحكم إنه ما كان لهم يد في القرار .. أو إنه يتراكم عندهم كره لأسلوب تعامل الوالدين ممكن يتحول في يوم لعقدة نفسية و يطلعوه في عيالهم ، فما أقول غير يا أهالينا .. يا أبائنا .. يا أمهاتنا دعوووونا نتنفس .. أعطونا مساحه نعبر فيها .. نبدع فيها .. حتى لو غلطنا بنتعلم من أخطائنا و هاذي هي سنة الحياة ، مو لازم يكون كل شي في حياتنا مبني على تجاربكم إنتوا و خبراتكم إنتوا .. خلونا إحنا نجرب و نكتسب خبره .
و أنا ما أدعو بكلامي هذا للعقوق أو العصيان .. بالعكسسسس .. يمكن أنا شخصياً لو كنت في مكان واحد من أصدقائي إلي حكيتكم عنهم يكون لي نفس ردة الفعل لكن ليش تحولوا العلاقه بيننا لعلاقة ما فيها غير طرف واحد "يستقبل" .. ليش ما تخلونا نأخذ و نعطي و نتناقش و نختلف و نتفق .

الزبدة :
 التربية فن .. و لا مانع إننا نحاول أحياناً ننتقد إبداعات أهالينا في حدود الأدب .
  • الزواج مسؤولية محد يحاسب عليها إلا الزوج و زوجته .. فأي قرار يتعلق بالزواج لازم يكون بموافقة و رضا أحد المسؤولين .. لا تتوقع بنت الناس لو جت البيت و شافت الحمام نص متر في نص متر و قلتلها إنه بسبب "أمك" إنها بتتقبل عذرك .
  • قالوا (الإدارة هي أن تعرف متى تقول "لا" .. أي شخص يستطيع أن يقول "نعم") و أهم شي لازم تديره هو حياتك .. لا تهز رأسك على أي شي .
  • و أخيراً .. لن أعيش في جلباب أبي لأنه ضيق عليه .. و لن أعيش في جلباب أمي لأنه حريمي .. أنا أحب ألبس فوطه :) .

عجبي .

9 التعليقات:

د. خالد السبيت يقول...

إن التنشئة الأسرية سبب رئيس في خلق جيل غير قادر على اتخاذ قرار شخصي ، فكيف يُراد منه خلق مستقبل أمة ، أتفق معك تماما أستاذي الكاتب فيما ذكرت ، يجب إعادة النظر في طريقة تربيتنا لأبنائنا ، فهذا النوع من التربية أول من سيخذل (مصدره) إذ الوالدان سيشتكيان من إتكالية ابنهما وعدم مقدرته للتعامل مع الأمور حين احتياجهما لذلك ، وسيحتاجان في يومٍ ما.

يجب على الشخص المعني أن يدخل في دورات تدريبية لتطوير الذات وإكتساب مهارات إتخاذ القرارات ، وأن يعيشا حياتهما على النحو الذي يريدان دون المساس بحقوق والديهما ، فهما أمران متوازيان ولا يتقاطعان ، ولو أراد والداه إرغامه على أمرٍ فالشرع المطهر قد جاء واضحاً في أنه لا طاعة حينئذٍ مع الإحسان إليهما في طريقة وأسلوب الرفض

أشكرك على موضوعك هذا الذي سيساهم كثيراً في رفع الوعي لدى جيل الشباب لا سيما وأنه قد خرج من شاب طموح مثلهم ، غير أنني أتلمس فيه صفات تزيد عنهم : القيادة والرؤية العميقة والإبداع.

تحياتي العطرة إليك

fofa faqih يقول...

 صباح الخيرات :)
كل سنة وانت طيب ع المناسبات التلاتة كلها .. وان شالله نشوفك عجوز بسن واحد ولسى بتدون p:
ملاحظتك هذي لها طعم مختلف ... فمشاهدة انفعال ما قبل التدوين كانها مخاض ثم ولادة فحمدلله ع السلامة :)
...
موضوع تحكم آلاهل الزائد ب أبناءهم مشكلة يعاني منها كثييييير من شبابنا(( شباب تطلق ع البنات والأولاد))
لكن خلينا نكون حقانين شوية آلاهل همهم الاول والأخير توفير حياة كريمة لهم ومستقبل مضمون ....مش بالضرورة تكون آرائهم صح 
لكن لنتفق ع نقطة انها نابعة من حب ...
اضافة الى ان السن الكبير للآب او الام يجعل تغيير طريقة التعامل والتفكير صعبة حبتين ... بس كل شي بالسياسة يسير والدحلسة والكلام الحلو ما خلى شي كل شخص وله سكة والي مايعرف لامة او أبوة سكة ف دا غبي مع احترامي الشديد 
(( من له الحيلة ف ليحتال))

اضافة الئ ان جزء كبير يتحملة الولد او البنت امممم بباش نقول لازم تفرض شخصيتك لا نقول لازم تبين لاهلك ان لك تفكير وشخصية ونمط حياة منفصل تماماً عنكم ولكن يظل ينتمي لكم .. بشكل او باخر 
يعني الي يوصل ٢٨ سنة ومايعرف يفتحلي بيت كيف بيحسسني أني زوجة لي مكانة وسط اهلة ...!!!
هذي مشكلة كبيرة 
والدتك الله يخليها لكم تذكرني بامي ماشالله توجه وتنصح بس ما تجبر وهذا الصح 
خلونا نغلط مو مشكلة عادي نتعلم
نتعور شوية ونتعافى ونقوى ...الحياه تحتاج تجارب بدونها مانقدر نكمل ..

..
قصة(( صديقة لي في الثانوي جات مرة المدرسة وجسمها اثار ضرب من أمها والسبب انها تبا تزوجها والبنت رافضة من خوف تخيل ١٧ سنة:/
وفعلا زوجتها الان البنت علاقتها بأمها صفر تقول امي دمرت مستقبلي لا جامعة ولا شهادة وفقدت طعم الحياه ولاعشتها))

الشاهد :
العلاقة لو تدمرت بين آلاهل والأبناء مستحييييييييييل ترجع زي الاول مستحيل 
... ف حافظوا عليها لا تدمر بسبب أنانيه وان كان دافعها الحب ... او احلام مفقودة نسعى لتحقيقها فيهم

ملاحظتك هذي تنبيه للآباء والأمهات الجدد ان يشعرو بحق أبناءهم في الحياه وعيش كل تفاصيلها ... اغرس فيهم ثقتك وحسن الخلق وأتركوهم ليتعلمو ...
لافض فوك ولا جف قلمك قصدي كيبوردك :)

Awoosha يقول...

وكل عام وأنت بخير أخ عبدالله ~ أيش هالصدف امس كان عيد ميلادي بعد << أيه ألمح إني أبغى هدية ههههه
عسى أيامك فرح إن شاء الله ويارب تتحقق كل أمانيك ^^

أما الموضوع جداً رائع
لأن الأغلبية وللأسف يا أما من هالنوعية أو من نوعية عقوق الوالدين يعني ما في وسط
وصح مثل ما قلت كلام أمي وأبوي وأقتراحاتهم على العين والراس لكن مو عاد في كل شي
وعجبتني هالجملة " و لا مانع إننا نحاول أحياناً ننتقد إبداعات أهالينا في حدود الأدب . "

وبالفعل ترا ما يضر هالشي يعني أوكي ينصحون ويرشدونا بس مو يتحكمون فينا ، إذا أستمروا في هالشي كيف بياخذون الابناء الخبرة من الحياة وكيف راح يعتمدون على نفسهم ~

أنا ما راح أعاندهم أو أعصيهم مجرد نقاش ودي أبين لهم فيها وجهة نظري وكيف إنهم لازم يعطوني فرصة أختبر الحياة وأجربها وبالنهاية هم أمي وأبوي وأكيد برجع أتشاور معاهم لو أحتجت للمشورة ~

وأتفق مع الاخت fofa faqih  تراه بالنهاية هو نابع عن حب الاهل للأبناء بس بزيادة حبتين وأحيانا أكثر
هم مهما كبرنا يعتقدون باننا لازلنا صغار ونحتاج رعايتهم وللحين ما نعرف شي بحياتنا ~ وأكيد لو أستمروا ترانا ما بنعرف شي


والكلام يكثر وما يقل في هالموضوع
بس أكتفي بهالقدر ^^


يعطيك العافية أخوي عالطرح
وبإنتظار كل جديدك
=)

سكتشات يقول...

يالله دائما لكا لما اقرأ مواضيعك كأنها مكتوبه لي شخصيا :")
عجبني كلامك عن الزواج [الزواج مسؤولية محد يحاسب عليها إلا الزوج و زوجته]
تدوينه جميله جدا اخوي
وكل سنه وانت بخير =)

Abdullah Abdulaziz يقول...

يا حيالله الدكتور خالد ، كم سعدت بمرورك و كلماتك الساحرة أستاذي الكريم .
أستاذي الكريم أتفق معك فيما يتعلق بالدورات التدريبية الخاصة بتطوير الذات و لكن حسب ما أظن أن المعضلة هي الإعتراف بوجود المشكله أساساً .. فالأغلب لا يرى في هذا الوضع أي خارج عن المألوف سوى عندما تمر السنوات و يحصد نتاج هذا التحكم .

الشكر لله ثم لك أستاذي الفاضل على إضافتك الرائعة لكلماتي المتواضعة .. و عسى أن أكون عند حسن ظنك .

لا عدمنا مرورك ...

تلميذكم
عبدالله

Abdullah Abdulaziz يقول...

صباحك نور و سرور أختي فوفا :) .
و إنتي بألف خير و صحه و سلامه .. سن واحد و فيني حيل أكتب !! يالله حسن الختام .

الله يسامحك تعبتيني .. ما قدرت أضيف ورى كلامك شي ما شاء الله .. ما أقول غير إني أتفق معك في كل ما قلتي ، و يا ليت إننا كلنا نعرف "ندحلس" و نسايس آبائنا و أمهاتنا .

الله يعين صحبتك و يقرب بينها و بين أمها من جديد .. برأيي العلاقه بالأم هي أهم و أجمل علاقه في الحياة .

شكراً لك على هاذي الإضافة الرائعة ..

عبدالله

Abdullah Abdulaziz يقول...

كل عام و إنتي بخير و عقبال المية سنه أختي عائشة .. خلاص .. لو جتني هدايا بأرسلك إن شاء الله << يدري ما بيجيه لبان حتى .
ذكرتي نقطه مهمه أختي عائشة .. الأغلبية متطرفين في التعامل مع الوالدين .. يا إما طاعة عميا أو عقوق ، يا ليت نتعلم الوسطيه  و الحكمه في التعامل .

ما عمرنا نكتفي من إضافاتك الجميلة أختي عائشة فلا تحرمينا منها .
لا عدمنا حرفك

عبدالله

Abdullah Abdulaziz يقول...

ياحيالله أختي سكتشات .. إفتقدنا طلتك و تعليقاتك .
يسعدني جداً إن كلماتي تعبر عن أفكار نشترك فيها ، الأجمل مرورك .. أسعدني جداً لأنه جا بعد غيبه "الله لا يعيدها" .

و إنتي بأف خير و صحة و سلامة

عبدالله

Dalya Babgi يقول...

:) مبدع كعادتك .. 

إرسال تعليق