13‏/11‏/2012

قصتي القصيرة .. جداً في عالم الأعمال


منذ سفري للمرة الأولى لدبي و أنا معجب جداً بطريقة تسويقهم للبلد و معالمها بصناعة المجسمات التذكارية و توفيرها في جميع المولات و تكلمت عن إعجابي هذا في ملاحظة سابقة ، و من هاذي المجسمات التذكارية مجسم برج العرب .. برج خليفة .. ميدان الساعة .. و غيرها ، أعجبتني الفكرة جداً لدرجة إني قررت أطبقها كمشروع تجاري .
و بحكم إن جدة هي المعبر الرئيسي للحجاج و زوار الحرمين على مدار السنة و من أهم المناطق السياحية في البلد فالبيئة خصبة جداً لمثل هذا المشروع ، و أنا لو كنت زائر للمملكة بيهمني أشتري تذكارات لهاذي المدينة خاصة إن فيها معالم جميلة ، من هاذي المعالم على سبيل المثال ..


نافورة جدة

ميدان الكرة الأرضية

ميدان الفلك

هذا الميدان إلي ما أعرف إسمه ..

ميدان الدراجة

تواصلت مع مصانع في الصين و أعطيتهم بعض الصور للمعالم إلي أحب أصنّع منها تذكارات و إتفقت معاهم و إستقريت على سياسة تسويق و بيع و توزيع .. و ما بقي غير الإجراءات النظامية من فتح سجل تجاري و معرفة إجراءات التخليص الجمركي .. و خلافه .

رحت للجمارك أستفسر منهم عن إمكانية إستيراد هاذي الأشياء ..

أنا : لو سمحت .. أبغى أستورد مجسمات للمعالم السياحية إلّي موجودة عندنا .. هل هذا ممكن ؟
موظف الجمارك : هذا شي جديد علينا .. روح للمدير .

أنا : لو سمحت .. أبغى أستورد مجسمات للمعالم السياحية إلّي موجودة عندنا .. هل هذا ممكن .
مدير الجمارك : جديدة هاذي السالفة ... أممممممممم ... هاذي المعالم مملوكة لأمانة جدة .. روح خاطبهم ، بعدين إنت إشلك و إشل الكلام الفاضي هذا ؟! شوف شوف (طلعلي ألعاب أطفال) شوف هاذي ألعاب واحد مسويها في الصين ليش ما تسوي زيها أحسنلك من المجسمات إلي ما لها فايدة ؟!
أنا : (بنبرة تصريف) تصدق !! معاك حق .. يالله الله يجزاك خير .

توجهت لأمانة جدة علشان أستفسر عن الموضوع ، دخلت الأمانة و سألت موظف الإستقبال عن القسم المسؤول و وجهني لقسم العلاقات العامة و الإعلام ، توجهت لمكتب الدكتور مدير القسم ، بما إن الوقت كان بعد صلاة الظهر فسعادة الدكتور كان مروق و مريح و حاط رجوله على المكتب و جالس بالطاقية ..

أنا : آسف على إزعاجك يا دكتور بس حبيت أستفسر منك عن .... (حكيتله القصة) .
الدكتور : أمممممممم .. فكرة جديدة .. (و بعد تفكير طويل و عميق) هاذي المعالم هي "إهداء" لمحافظة جدة و علشان تستخدمها بشكل تجاري محتاج تأخذ موافقة خطية من الفنانين المصممين لهاذي المعالم و الذين قاموا بإهدائها للمحافظة .
أنا : طيب بحكم إنها مهداه للمحافظة هل فيه إمكانية تكون الموافقة من قبلكم ؟
الدكتور : ممكن هذا يدخلنا في ملابسات مالها داعي .. لا .
أنا : طيب يا دكتور هل من الممكن تساعدوني في التواصل مع مصممين هاذي المعالم .
الدكتور : لا .. مالنا علاقة .
أنا : طيب .. هل من الممكن إن الأمانة تتبنى الفكرة ؟ بحيث إني أكون منتج و موزع لهاذي المجسمات و متعاقد مع الأمانة ؟
الدكتور : إنت كمؤسسة ؟!؟! لا لا .. و بعدين إحنا إشلنا في الكلام الفاضي هذا !!

رجعت لعملي و مساء نفس اليوم رحت لمكتب تخليص جمركي حكيتله القصة ، و كان ملخص حواري مع المسؤول في المكتب إنه ممكن بكل بساطة يخرجلي هاذي البضاعة من الجمارك إذا "دهنت السير" بدون ما أحد يقول شي ، و بعد كذا أبيعها للمحلات بكل بساطة بما إن أغلب المحلات أساساً تبيع بضايع مقلدة غير مصرح بدخولها للبلد .

بعد هاذي الزيارة لمكتب التخليص الجمركي كنت بين ثلاث خيارات ..
  • إما أتبع الأنظمة .. أو بمعنى آخر أدخل دوامة لها بداية و ما لها نهاية بما إن بعض مصممين المعالم أجانب و البعض الآخر متوفين .
  • "أدهن السير" أو بالفصحى "أرشي" و أشتغل بطريقة غير نظامية .. و وقتها أكون مضطر أعيش مع فكرة إن مشروعي كله ممكن يكون حرام في حرام .
  • أنسى فكرة هذا المشروع و أدور عن فكرة ما تعتبر "كلام فاضي" برأي مدير الجمارك و مدير العلاقات العامة في الأمانة .

و قررت أختار الخيار الثالث و أنسى الفكرة .

الزبدة :
  • قد تكون صاحب فكرة "ريادية" و مفيدة للبلد ، لكن .. قد تعتبرها الجهات المسؤولة "كلام فاضي" و أكيد إنت ما تعرف أكثر من الحكومة ...
  • في السعودية إذا حبيت تصير ريادي .. خليك في الأكل و المشاريع إلّي تقدم خدمة .
  • إذا كنت حاب تبدأ مشروع يقدم "منتج" لا تتفلسف و تجيب فكرة جديدة و سوي زي ما خلق الله تسوي.. إفتح محل في شارع فلسطين و بيع جوالات.. أو إفتح محل في شارع صاري و بيع جزم.. أو إفتح محل في البلد و بيع فنايل و سراويل.
  • كل شي ممكن يمشي إذا "دهنت السير" .. و هذا يلغي كل ما سبق ذكره في الزبدة .

في الختام ..
إذا كنت من جدة و عندك فكرة مشروع برأس مال بسيط و ما يحتاج "دهن سير" يا ليت تفيدني فيها و ممكن نصير شركاء ، و إذا كنت مهتم بمتابعة المزيد من بربرتي الفاضية .. تابعني في تويتر ، تلقى الزر في أعلى الصفحة على اليمين .

.. عجبي .

12 التعليقات:

Bassem M. | باسم يقول...

ع الجرح ياصاحبي ..


أكثر من مشروع فكرت فيه ودرسته وكان من الممكن يدر علي مبالغ ممتازة ، لكن تعقيد الاجراءات أكبر عائق ..
كنت راح استورد شغلات معينة متوفرة هنا بأسعار مبالغ فيها ، أقدر أوفرها بسعر أقل بنسبة 35% تقريباً ..!

للأسف لقيت نفسي قدام الـ3 خيارات .. واخترت انسى :/


* مو مجاملة لكن أحب ملاحظاتك ، وطريقة سردها .. ربي يوفقك ويسعدك :)

غير معرف يقول...

انا من شفتك حاط صورة الريال وانا اضحك مع شوية احباط :)

اتفق معاك

وانا دفعت ١٠ الاف علشان ابداء مشروع خاص وبالاخير تسكرت في وجهي بسبب التعقيدات الجديدة لوزارة العمل

اخوك زياد

ساره يقول...

شي جدا محبط إذا كان الوضع كذا
بس في فكرة ثانيه غير الاستيراد..ممكن تتفق مع شابات وشباب من جدة يشتغلو الاعمال بنفسهم..مثل خريجات الفنون او هندسة الديكور. .ح تنصدم بالعدد الكبير اللي مستعد ل فكرة زي كذا ومدى اتقانهم وجودة أعمالهم. .وممكن تستخدم التسويق ال إلكتروني اسهل واسرع وتتواصل فيه مع شريحه كبيرة من الناس خصوصا الاجانب وبرضو اسهل ب التسويق ل الفكرة واقل تكلفه. .ويساعدك في اختبار مدى القابليه على الفكرة فإذا كانت كبيرة ممكن تفتح محل رسمي وتوسع الفكرة ل تشمل مدن المملكة كلها..انتاجك ل رموز محلية وب ايدي محليه سعودية فكرة قوية و تلفت نظر كثير من الناس خصوصا الان.
.اعذرني إذا طولت هو التخصص يتكلم (mis)
بالتوفيق. .بانتظار التدوينه القادمه

محمد مصيباح يقول...

كان لي محاولة ولا زلت احاول لكن هذي المرة راح احاول خارج المملكة لأنك اذا تبغى عملك يمشي هنا لا مؤاخذة لازم تصير حرامي مع احترامي الشديد لك 

كثير من الأفكار والمشاريع ماتت وتم دفنها بسبب التعقيدات والأنظمة المعقدة وكل ما فكرت في مشروع ألقى نفسي اختار الخيار الثالث بسبب اللي يصير من تعقيد 

الله يصلح الحال بس 

Ethar Al Tamimi يقول...

6 شهور وأنا أفحط بــ مشروعي وأعمل دراسة الجدوى وأحاول أرضي الأطراف ,, وبعد جهد جهيد وافقوا على تمويلي  ,, والآن أنتظر ولي أمري يوافق على الكفالة ! ,, قيد مابعد قيد ,,
أحياناً تراودني شكوك بأنني قاعده "أشحذ" :(
مشكلتك ليست مشكلة الحكومه وأنما مشكلة العقول الفارغة اللي شاغلة المناصب العليا ,العقول اللي تهمها الراتب آخر الشهر والمسمى الوظيفي فقط !

Mola7dat يقول...

معرفة التجار بتعقيد الإجراءات يعطيهم جرأة أكبر على رفع الأسعار لحد السرقة .. بكل أسف
ربي يسعدك و إن شاء الله دايماً ملاحظاتي عند حسن ظنك .. الله لا يحرمنا تواجدك :)

عبدالله

Mola7dat يقول...

يا حرامي يا متحايل على القانون
اللهم آمين .. الله يسمع منك

تشرفت بردك أخوي محمد :)

Mola7dat يقول...

 ما بقي إلا القليل أختي إيثار .. الصبر الصبر ، الله ييسر أمرك و يرزقك من حيث لا تحتسبي
بالفعل العقليات المتحجرة و الرافضة للتطور هي من أكبر مسببات هاذي التعقيدات

بلغينا أول بأول عن تطورات مشروعك :)

عبدالله

ضيفة يقول...

تقدر تبدأ مشروعك باستيراد تحف ومجسمات فنية عادية وبعد كذا تدخل معها المجسمات التذكارية ..وصدقني محد راح يقولك شي

الاستيراد من الصين يقول...

الاستيراد من الصين
استيراد البضائع والمنتجات من الصين
شركات الشحن الصينيه
دليل المصانع الصينيه
استيراد من الصين بدون سفر

شركة الأنظمة الأمنية لكاميرات يقول...

شركة الأنظمة الأمنية لكاميرات المراقبة

كاميرات مراقبة

ماكينات حضور وانصراف

اجهزة سنترالات

اجهزة انتركم

كاميرات مراقبة مخفية

كاميرات مراقبة لحماية محلات الذهب

التحذيرات قبل شراء كاميرات المراقبة

المسموح والممنوع من كاميرات المراقبة

أجهزة الأنظمة الأمنية

كاميرات مراقبة للقضاء على الاهمال

تركيب وتوريد وبيع كاميرات المراقبة

ماكينات حضور وانصراف تتعرف على الوجه

استفسارات ماكينات الحضور والانصراف

حضور وانصراف بالبصمة والوجه والكود

اجهزة انتركم جماعية

اجهزة سنترالات بشاشات

شركة الأنظمة الأمنية لكاميرات يقول...

ماسة للتجارة الخارجية

كاميرات مراقبة في مصر

اجهزة حضور وانصراف

كاميرات المراقبة المتحركة

نصائح قبل شراء كاميرات المراقبة

كاميرات مراقبة لمصنعك

شركة بيع كاميرات مراقبة

كاميرات مراقبة IP

أقل اسعار كاميرات مراقبة في مصر

كاميرات مراقبة سلكية ولاسلكية

كاميرات المراقبة المخفية

كاميرات مراقبة الصندوق

ماسة لاجهزة حضور وانصراف

تركيب وصيانة اجهزة الحضور والانصراف

اجهزة حضور وانصراف ببصمة الاصبع

اجهزة حضور وانصراف ببصمة الوجه

اجهزة حضور وانصراف بالكود الذكي

إرسال تعليق