بس الفشيلة الأكبر .. يوم يكون معاك ورقة بخمسمية ريال و حسابك أقل من مية ريال .. تطلعها و إنت مستحي و تبدأ تميل رأسك و تطالع في الكاشير و إنته تلعب بعيونك و تقوله ((معليش .. ما معايه صرف)) .
زمان كنا نستحي من النص ريال و الربع ريال .. ذحين ما صرنا نستحي منها .. لأنه أساساً لو أعطيتها كاشير بيدخلها في خشمك ، لااااا ذحين كبرنا و صرنا نستحي من الخمسمية .
الله يرحم أيام العيديات يوم كنا نجمع القرش على القرش إلين ما تصير خمسميه و نروح البقالة نقوله ((أربطها)) يعني أعطينا إياها ورقة وحدة علشان نكشخ فيها .
ذحين صارت فيه محلات عندها سياسة ضد الخمسمية و منها بارنيز مثلاً .. حاط ورقة على كل كشك من أكشاكه كاتب فيها ((لا نقبل الخمسميات .. و إلي يطلع خمسميه بينفرش)) فمره من المرات .. كنوع من أنواع الإستهبال طلعت خمسمية .. طالع فيني البياع و أشر على اللوحة و دخل بالقهوه و قفل الشباك ... طيب صبررررر يمكن معايه فكه بس أستهبل ... صبرررر .. على طول قفل كدا .. إيش كلام صديق ؟
الزبدة .. نصائح لحملة ورقة الخمسمية :
- فكها .. و بعدين براحتك لو حاب تذوقها و تغمسها .. بس أهم شي لا تدخل محل إلا بعد ما تفكها .
- لا تروح بخمسميتك لحلاق .. صارلي الموقف هذا مية مرة و كل مرة يرجعها يقولي روح فكها .
- روح بقالة في الليل ((علشان يكون الكاشير مليااااان على قلببببه الفلوس)) و إشتري و خليه يفكها .
- لا عمررررررررك تدور فكه مع أصحابك أو أهلك .. صدقني بينصبوا عليك .. أو تنصب عليهم .
- السوبرماركت .. المحطة .. المحاسب في شغلك .. مكتبة جرير .. هم أصدقائك في هذه الحالة .
.... عجبي
1 التعليقات:
هههههههههههههههههههه انا ماعندي الا خمسميه ودايم اتوهق مع البقاله وفي السوق الهندي حق البقاله من كثر ماتعود على خمسميتي صرت امد ها له وفي ثانيه يرد لي الباقي ؟سبحان الله وش دراه اني بعطيه خمسميه هههههههههههه
مدونه رائعه استمرررررررررررررررر
إرسال تعليق