16‏/05‏/2011

مين هذا ؟


هذا الماثل أماكم في الصورة أيها السيدات و السادة .. سعيد .. حبشي الجنسيه .. متزوج .. ما عنده أولاد .. ناوي يجلس في السعودية كمان 3 سنين و يرجع الحبشه .. عامل نظافة .. راتبه 1500 .. يكرف من 7 و نص الصباح إلى 5 العصر ، يكنس و يمسح و يعطر و يحط مناديل و يغير أكياس زباله و يشيل و يحط و يجيب من البقاله و أحياناً يشتغل نجار و أحياناً مراسل .

يشتغل لحاله ، ما في أحد يساعده ، و لا فيه أحد يحل محله .
غير إسمه المسجل في الإقامة له عدة مسميات ثانية ((عامل النظافة ، الحبشي ، العامل)) .

له تقريباً شهرين شغال معانا في الشركة .. و إلى الآن نص الموظفين ما يعرفوا إسمه .

عندنا في الشركة فيه غرفة تدخين و قهوة و خلافه .. مرة و إحنا جالسين في الغرفة واحد إنكبت نص قهوته على الطاولة .. عادي .. شرب قهوته و ترك فنجانه على الطاولة و قام يبغى يرجع لشغله .
أنا طبعاً ما يمشي معايه الكلام هذا .. ناديته .

أنا : طيب يا أخي .. مسح القهوة .. شيل فنجانك رجعه للكفتيريا .
هو : ليش ؟ مو فيه عامل يأخذ فلوس علشان ينظف ؟
أنا : ...... .

فيه عامل .. و أكيد ما يشتغل ببلاش .. بس إيش بتخسر لو طلعتلك منديل و مسحت إلي كبيته ، و في طريقك و إنته رايح مكتبك تحط الكوب في الكفتيريا ؟ و لا إحنا زي الحيوانات ((أكرمكم الله)) نعرف نوصخ و ما نعرف ننظف ؟

طيب .. إيش بتكسب ؟
و لاااااااا شي .. غير إنك بتحس إنك راضي عن نفسك .

نرجع لسعيد ((أبو ضحكه جنان الماثل أمامكم في الصورة)) ، إيش دخله في هاذي الملاحظة ؟ أنا أقولكم .

أحلى شي يوم تدخل عملك الصباح و يقابلك واحد بإبتسامه من القلب لا فيها نصب و لا نفاق .. قسم بالله تدخل عملك متفائل و تحس إنك راضي عن نفسك ، و الحمدلله رب العالمين كل يوم يستقبلني سعيد بهاذي الإبتسامة .

و إيش كلفتني إبتسامته ؟؟ شي واحد .. إني ((((((((أهتم)))))))).
مره كنت فاضي و جلست معاه .. إنت من فين ؟ فين كنت تشتغل ؟ متزوج ؟ كيف الشغل هنا ؟ و بس .

و للأسف الأغلبية تضحي بإبتسامة سعيد و أمثال سعيد علشان أسباب بايخه و كذاااابه ...
  1. ((ماني فاضي ، عندي شغل)) .. يا إلي مقطعك الشغل ، لك أسبوع غايب بحجة إنك تتطمن على أهلك في الرياض .
  2. ((برستيجي)) .. أي برستيج يا آنسه مينشن ((إلي شاف فلم كرتون سالي بيعرفها .. و إلي ما يعرفها يقوقلها)) .. كلنا عيال تسعه على قول أخوانا المصريين ... إلا على فكرة .. إيش معنى الكلمه من أساسه ؟
  3. ((تكلمت معاه قبل كذا)) إيش قلتله ؟؟ "هيه .. جيبلي علبة مناديل" .... و نعم الحوار .

بلاش نطول لأنه إرتفع ضغطي ... الزبدة:
  • قال رسول الله صلى الله عليه و سلم : (طوبى لمن تواضع في غير منقصة ، و ذل نفسه في غير مسألة ، و أنفق مالاً جمعه في غير معصية ، و رحم أهل الذل و المسكنة ، و خالط أهل الفقه و الحكمة).
  • مهما كنت مشغول .. ما راح يأخذ كثير من وقتك إنك ((((((((تهتم)))))))).
.... عجبي

6 التعليقات:

غير معرف يقول...

صباحك ابتسامهة سعيد ... شكراً لك على التدوينه ،

حاله حال الي يشتغلوا في البيوت .. قليل يتكلم معاهم أو يفهم شخصيتهم علشان "ماياخذوا وجه علينا" .. يتكلموا عنهم كأنهم انتهازيين ، ايش الي ما ياخذوا وجه؟ .. الله يديم عليك صباح سعيد

Awoosha يقول...

في الصميم ~
عاد وينهم اللي يعتبرون
كله أسباب وحجج غير مقنعة~
أنا مادري ليش يحطون من قدر العاملـ/ـة

بالنهاية هم بشر
ويستحقون الاحترام على اللي قاعدين يسوونه
كفاية إنهم عايشين في غربة، وشوية إهتمام راح يخفف عنهم غربتهم ~ حطوا نفسكم مكانهم وبتعرفون إيش يبغون

وكما قال رسولنا الكريم ((أحب لأخيك ما تحب لنفسك))

وبارك الله فيك أخوي
على طرح الموضوع~

Nora يقول...

يعطيك العافيه

صدقت في كل كلمه قلتها
مثلا
انا جالسه مع بنت بسيطه وعلى قد حالها
تسالني صاحبتي ليش جالسه معاها
اقول انها كانت تبي مني شي وجلست معاها ليش؟
هنا طبعا ماتقدر تقولي انها ماتشرف اني اجلس معاها فاالعذر الوحيد ماارتاح لها
عجيييب ماترتاحين اجل طيب انا مرتاحه

اما برستيجي هذي حاله خاصه ماادي ايش هالبرستيج اللي خايفه عليه!!

الله يهديهم
يعطيك العافيه لطرح الموضوع ولانك تذكرت هالفئة المظلمومه في مجتمعنا =)

Mola7dat يقول...

Sayapodcast : صباحي سعيد بشوفة هالتعليقات الحلوة أختي إسراء .. و صح لسانك ، و الإحترام ما هو بأخذ وجه أو أخذ قفا .. المحترم يفرض إحترامه .
سعيد بتعليقك و الله يديمها عادة :) .

Awoosha : زي ما قلتي أختي .. المشكلة إننا ما نتقبل نفس السلوك من الناس .
يعني تلقي ناس بينهم مشاكل .. و على إيش ؟ "ليش يكلمني من طرف خشمه ؟" .. حلال عليهم و حرام علينا .

الله يبارك فيكي و يخليكي .

nora: ما ترتاااحلها يا نوره .. تحبس عنها الأكسجين .. مو ذنبها .
الله يعافيكي و لا تحرمينا من طلة برستيجك ربي يسعدك =)

ήσѓα يقول...

يعطيك العافيه

صدقت في كل كلمه قلتها
مثلا
انا جالسه مع بنت بسيطه وعلى قد حالها
تسالني صاحبتي ليش جالسه معاها
اقول انها كانت تبي مني شي وجلست معاها ليش؟
هنا طبعا ماتقدر تقولي انها ماتشرف اني اجلس معاها فاالعذر الوحيد ماارتاح لها
عجيييب ماترتاحين اجل طيب انا مرتاحه

اما برستيجي هذي حاله خاصه ماادي ايش هالبرستيج اللي خايفه عليه!!

الله يهديهم
يعطيك العافيه لطرح الموضوع ولانك تذكرت هالفئة المظلمومه في مجتمعنا =)

Mousa يقول...

وربي ان الرجال هذا من افضل الناس الي قابلتهم و النعم فيه .. بصراحه زي العسل مع ان راتبه قليل و حاله حاله .. يكفي ابتسامته ..

إرسال تعليق