24‏/05‏/2011

إشبك تطالع ؟



بحكم إني مدمن من طفولتي و بحكم إني مهمل من طفولتي جلست يوم الخميس الماضي بكل سعادة و بلا فخر في غرفة إنتظار مستشفى مغربي للأسنان أنتظر دوري عند دكتور علاج الأعصاب علشان يسويلي علاج عصب لأربعة أسنان في جلسة وحدة .

و طبعاً بما إني كنت عارف إنه هذا مصيري بعد 26 سنه إدمان شوكولاته و بعد 26 سنه إهمال في زيارة دكاترة الأسنان فكنت جالس بإبتسامة أكبر من مدخل المستشفى .. عارف إنه ورايه مجزره عند الدكتور و بيعطيني إبر بنج إلين ما تنمل عيوني و بيخرم في أسناني إلين ما يوصل لمعدتي .

و في نص سرحاني و جلستي الواثقة تنبهت لآنسه مرت من قدامي تفرصعلي بعيونها ((ما أعرف كيف أترجم كلمة تفرصعلي .. يعني تفتحلي عيونها و تنظرلي نظرة غضب و حنق)) أنا يوم لاحظت النظرة تنبهت و طار السرحان .. حطيت عيوني في الأرض و جلست أفكر .. يا ربي ليش تفرصعلي ؟ إيش سويتلها ؟ و إكتشفت بذكائي الخارق و سرعة بديهتي إنه الظاهر و الله أعلم إن الآنسة كانت تحسبني أبتسملها و سرحان في جمالها .. ما تدري إنه ورايه هولوكوست عند الدكتور و ماني فاضيلها .

بطلت سرحان و فتحت آي فوني و جلست ألعب أنجري بيرد إلي مخلصها مليون مره قبل كذا .. بس علشان أضيع وقت .

و بعد ما رجعت البيت مصفوقاً ((هاذي فصحى)) بثلاثه إبر بنج في برطمي العلوي تذكرت الموقف و جا سؤال على بالي : "هل حتكون ردة الفعل مختلفة لو كان الشخص إلي ظن إني أطالع فيه رجال ؟" .

قلت ياااا ولد مبدهااااش .. خلاص هاذي التدوينة الجديدة و القراء يستاهلوا أدعمها لهم بتجربة عملية .

إنتظرت إلى ما فك البنج و رحت لأمي أسألها عن أخبارها و أنا مبتسم .. سألتني : ((خير .. وش فيه ؟)) .. قلت سلامتك و مشيت .

بعد العشا جاني صاحبي البيت .. إنتظرته عند الباب و أنا مبتسم .. سلم .. ردت عليه .. و سألني : ((خير ؟)) .. قلت سلامتك .

صباح ثاني يوم رحت السوبرماركت و قلت بأكمل التجربة .. مر جنبي واحد عند ثلاجة الألبان .. إبتسمتله و سلمت .. طالع فيني و رد السلام بصوت واطي .. و حط عيونه في الأرض و شرد من عند الثلاجة .

و أنا أنتظر عند الكاشير شفت شلة شباب داخلين السوبرماركت .. طالعت فيهم و إبتسمت .. الأول ما قال شي .. الثاني سوى نفسه مو شايفني .. الثالث فرصعلي ((فرصعلي : سبق ترجمة الكلمة في بداية الملاحظة)) و قال : خير ؟؟؟؟ إشبك تطالع ؟؟؟؟ .

و طبعاً أنا بحكم إني أقوى من غرندايزر و أفصح من القذافي رديت عليه : لا .. سلامتك .. مشبه عليك .

تذكرت مقالة قرأتها للكاتب مشعل السديري في جريدة الشرق الأوسط تكلم فيها عن رجال عجوز في بريطانيا كان كل يوم الصباح يحط كرسي جنب الشارع و يجلس .. و كل ما مر عليه شخص أو سيارة يبتسمله و يلوحله بيده الكريمة ، كان يعتبر نكتة المدينة و حاولوا بكل الطرق يخلوه يبطل هاذي العادة .. لكنه ما ترك عادته .

و بعد كم سنه مات العجوز .. و بدأوا الناس يفتقدوا وجوده ، و بعد كم شهر قرروا تسمية الشارع بإسم ((شارع السعادة)) و بنوا تمثال لهذا العجوز و هو مبتسم في نفس المكان إلي تعود يجلس فيه .

الزبدة :
  • قال رسول الله صلى الله عليه و سلم : ((تبسمك في وجه أخيك صدقه)) .
  • متى نتخلى عن نظرية إنه الإبتسامة معناها ((إستهزاء .. معاكسة .. إستهتار .. قلة إحترام)) و نربطها بالسعادة و نرجعها لمعناها الحقيقي ؟
  • متى الناس تفهم إنه مـــســـتـــحـــيـــل أحد يعاكسها في عيادة أسنان .. في عيادات الباطنيه ممكن .. لكن الأسنان مستحيل .. محد فاااضي .

... عجبي .

19 التعليقات:

غير معرف يقول...

صدقت والله .. هي زي أي حاجه، لما تشوفعا الناس بكثره ماعاد تستغربها أو تستفزها .. بالعكس راح تنبسط عليها، ويلا يا أفندي استمر بهالشي مش تخللي بس تجربه

Awoosha يقول...

بقولك ليش الأغلبية تغيرت نظرتهم لمعنى " الابتسامة " لأن ما عاد أحد يستخدمها كحسن نية أو كصدقة حسنة

هالأيام تشوف الإبتسامة يستخدمونها لإستخدامات مخالفة لمعناها الجميل >< للأسف

وهالشي أعتقد يحتاج لفترة من الزمن حتى يتذكر الناس إن الابتسامة في وجه أخيك صدقة، لأن آخر ما قد يطرأ على بال هالإستنتاج.

بالنسبة لي جربتها ولاحظت إن النساء الكبيرات في السن يتقبلون هالشي بسرعة ويردون عليك بإبتسامة عكس المراهقات أو حتى الأطفال صاروا يخافون لو احد تبسم لهم !!! يحسبون إنك مجنون أو ناوي على شي

وإن شاء الله يرجع المعنى والاستخدام الصحيح للإبتسامة عاجلاً غير آجل

ويعطيك العافية عالطرح
وبإنتطار كل جديدك
=)

Nora يقول...

هههههههههههه تذكرت نفسي
ترى انا من هالناس((الاعتراف بالحق فضيله

لما تبتسم لي وحده اناظر باستغراب على غباء يعني تعرفيني خخخخخخخ
والمشكله فمي يجمد مايرد الابتسامه لين تتفشل وتروح بس احس بالذنب بعدين اقول ياشيني ليش ماابتسمت =(

كل الناس يحسبوني شايفه عمري ومو عاجبني احد خخخخخخخ

ماقد ابتسم لي شاب بس اتوقع نفس ردت الفعل

هذا الحال قبل كم شهر بس كنه بدأ يتحسن خخخخخخخ

Mola7dat يقول...

sayapodcast: و الله أختي إسراء أخاف أستمر و يجي يوم و أنضرب .. و أنا بصراحه أسناني تعورني و ما عندي إستعداد أنضرب ((و نعم العذر)) .

Awoosha: فعلاً أختي عائشة ذكرتيني بمسألة الكبار في السن .. و بصراحة حسب تجربتي حتى الأطفال في بعض الأحيان يتقبلوا الإبتسامه .. يعني القاعده هنا هي ((لا تبتسم لأي شخص بين 3 سنوات و 70 سنه)) .

الله يعافيكي .. دائماً أسعد بكلماتك .

nora: إيش هذا يا أخت نوره ؟ و بعدين معاكي ؟ ناقصين فشايل ؟ و ليش الغرور يعني ؟ علشان عندك لاب توب ماك ؟

و الله للأسف أخت نوره الأكثريه بهاذي الطريقة و السبب يمكن إننا ما تعودنا .. إن شاء الله نكون بداية التغيير .

أخوكم
عبدالله

Nora يقول...

هههههههه اما عشان ماك اجل بشيله معي في كل مكان عشان يعرفون
لاوالله موغرور بس مدري كذا نفسيا ماابتسم مدري ليش
حتى بعض الاحيان الناس يفطسون من الضحك وانا ابتسم بس وبعض الاحيان ولا شي خخخخخخ
بالعربي يجيني حالة جمود بس مو دائما حالات خخخخخ
حتي ماما تقولي لما كنتي صغيرة يلعبونك يشيلونك ولا تبتسمين ههههههههه
مدري وش السالفة

وقلتلك بدت تخف احسن بكثييير من اول يعني كل مااكبر ابتسم زياده ^ــــــ^

shehab يقول...

بحكم عملي خدمــة عملاء ولي اربع سنوات وأعرف ثلاث ارباع الزباين الي بشكل دائم عندنا ..
مره من المرات جاء هزئني مديري بدون سبب ويقول أني ما اشتغل طرت فيهواترفع ضغظي لاني صراحة معاياالحق والشغل مافي أحد زيي يشتغل المهم طلعت من المكتب وأي زبون يجيني أكشر في وجهه وحتى الي يشوفني من بعيد ويبغا يسئلني يبطل من تكشيرتي
جتني طفلة صغير أموووورة وطالعت فيني وأبتسمة وانا مكشر والله يوم طالعت وأبتسمت حسيت انها تقووول ترا الدنيا ماتسووا كل الظغط والانفجار نسم طاار
الابتسامة سر ملغم مايفهمه الا الي يبتسم

Mola7dat يقول...

shehab: الإبتسامة إلي من القلب دايماً توصل للقلب .. إبتسم يا شهاب ترى الدنيا ما تسوى .

jawaher يقول...

ههههههه ..

الحمد الله .. اتوقع ان ابتسامتي ماتفارقني .اذا ماخاب ظني .

وتفسير الابتسسامه هـ اليومين تجي بمعنى الاعجـآب خصوصا في المجتمع المدرسي الثانوي . تبستم لبنت تروح تطلع اشاعه لكل المدرسه يمكن توصل للوكيله ان فلانه طالعت فيني وابتسمت يعني هي معجبه فيني . يَ ليل عليهم بس.

وربي ان الابستامه سر وسرها اكثر من رائع .

ولا تقطع عادتك . خلك دائم مبتسم واذا جاء يوم وبانت على ملامحك الزعل راح يفتقدون لبسمتك كل اللي حولك .

وعلى الطاري قبل كم سسنه صار لي موقف / في زواج بنت عمي .. سلمت على بنت ما اعرفها مو بس ابتسمت لها سلمت وكيفك وش اخبارك .. ورحت سالتني اختي تعرفيها قلت لا والله مااعرفها قالت ليه تسلمين عليها قلت لها ماادري ..

واخيرا ( عسى البسسمه ماتفارقنا )

Mola7dat يقول...

ـآح ــآسيس } : يا حيالله أختي أحاسيس .

طيب نفترض معجبه .. إيش الشي إلي يدعو للإشاعات ؟
الحمدلله خلصت دراسة و ما لحقت على هاذي الموضة الجديدة .

و سلامك على البنت إلي ما تعرفيها برأيي شي حلو .. يكسر الحاجز و يحسس الشخص إلي قدامك بالألفة .

آمين إن شاء الله .. و يا رب تكون زياراتك لملاحظات سبب في هالبسمه .. ما عندي إستعداد أحد يجي بكره يقولي نكدت علي :) .

لا عدمنا مشاركاتك و إضافاتك الجميلة .

عبدالله

jawaher يقول...

أول شي الله يحيٌك ..

لآ وين اعجـآب .. الاعجـآب في المجتمع المدرسي ولا الجامعي عند البنات ..توصل لدرجه الحب .. والعشق .. من غير ما يكون في كلآمي اي مبالغه . ومايحتاج اتكلم والكل يعرف وش يصير .

وزين انك مالحقت على ذا الشي كان شاب شعرك من اللي تشوفه .

القصد ابتسامه عابره . وتتفسر لشيء ثاني .

وان شاء الله تكون زيارتي دائم لملآحظاتك ..

اسعدني تواجدي للمره الثانيه عندك . ^_^

Mola7dat يقول...

ـآح ــآسيس }: الله يستر على بناتنا ... عقدتيني .

أنا الأسعد بمرورك و ردك أختي أحاسيس ، و إن شاء الله تكون ملاحظات عند حسن ظنك و تستاهل زيارتك .

ـآح ــآسيس } يقول...

أول شي الله يحيٌك ..

لآ وين اعجـآب .. الاعجـآب في المجتمع المدرسي ولا الجامعي عند البنات ..توصل لدرجه الحب .. والعشق .. من غير ما يكون في كلآمي اي مبالغه . ومايحتاج اتكلم والكل يعرف وش يصير .

وزين انك مالحقت على ذا الشي كان شاب شعرك من اللي تشوفه .

القصد ابتسامه عابره . وتتفسر لشيء ثاني .

وان شاء الله تكون زيارتي دائم لملآحظاتك ..

اسعدني تواجدي للمره الثانيه عندك . ^_^

Mola7dat يقول...

shehab: الإبتسامة إلي من القلب دايماً توصل للقلب .. إبتسم يا شهاب ترى الدنيا ما تسوى .

Mola7dat يقول...

sayapodcast: و الله أختي إسراء أخاف أستمر و يجي يوم و أنضرب .. و أنا بصراحه أسناني تعورني و ما عندي إستعداد أنضرب ((و نعم العذر)) .

Awoosha: فعلاً أختي عائشة ذكرتيني بمسألة الكبار في السن .. و بصراحة حسب تجربتي حتى الأطفال في بعض الأحيان يتقبلوا الإبتسامه .. يعني القاعده هنا هي ((لا تبتسم لأي شخص بين 3 سنوات و 70 سنه)) .

الله يعافيكي .. دائماً أسعد بكلماتك .

nora: إيش هذا يا أخت نوره ؟ و بعدين معاكي ؟ ناقصين فشايل ؟ و ليش الغرور يعني ؟ علشان عندك لاب توب ماك ؟

و الله للأسف أخت نوره الأكثريه بهاذي الطريقة و السبب يمكن إننا ما تعودنا .. إن شاء الله نكون بداية التغيير .

أخوكم
عبدالله

Mola7dat يقول...

ـآح ــآسيس }: الله يستر على بناتنا ... عقدتيني .

أنا الأسعد بمرورك و ردك أختي أحاسيس ، و إن شاء الله تكون ملاحظات عند حسن ظنك و تستاهل زيارتك .

دعاء يقول...

تدوينة بطلة !
مدري صرآحة متى الناس يبطلون التفكير الغلط ><"

بس بالنسبة لي أنا قررت أكون مبتسمة طوول الوقت مهما كان وصار الين ماخلق الله يتعدلون XP

أول مرهـ أسير على مدونتك عجبتني جدا 3>..~

Mola7dat يقول...

الأبطل ردك و مرورك أختي دعاء ، سعيد إنه المدونة حازت على رضاكي و إن شاء الله ما تكون آخر زيارة .
إن شاء الله خلق الله بيتعدلون إذا تعودوا على الإبتسامه .. و إن شاء الله كلنا نكون سبب في إنهم يتعودوا عليها .

رنين أيمن يقول...

من جد ..فجأة يجيني مود وابتسم لوحده "من صاحباتي" فتبحلق بعيونها : ايش في !! ..بديت اشك انو ابتسامتي شريرة .. T^T 

Mola7dat يقول...

ما أظن إن إبتسامتك شريرة أختي رنين بس الناس ما تعودت أحد يبتسملها .. الناس تبغى إلي يكشرلها و بس :) .

أسعدتني قراءة حروفك و لا عدمنا تواجدك و إبتسامتك .

إرسال تعليق